Lo ròdol immediat de Puèglaurenç es una alternança de colinas e de valons, al Nòrd dins lo país de Cocanha (Cocagne) al sud dins lo lauragués.

Los penjals de las colinas son camps semenats de sojà, de virasolelh, de milh… Fan miranda de lor or rossèl a la prima e en estiu, de polidas borietas lauraguesas un cop èra dedicadas a la cultura del tabat, del pastèl e de la vinha, senhorejan dels puèges vesins dempuèi l’Edat Mejana.

Las colinas mai ricas amassan a l’entorn d’un cloquièr, un manat d’ostals, un colombièr e d’unes çupressièrs… flambejants.

Aquela configuracion rurala e meridionala balha a aquesta tèrra, totas las caracteristicas per rivalisar amb la Toscana d’Itàlia. Tanben es coneguda en Anglatèrra coma “Little Tuscany”.

Aqueles paisatges autentics e preservats son una tentacion a s’encaminar, a percórrer las rotas solombradas de platanas e las carrieròtas dels vilatges vesins.