Senhorejant amb sos 375 m sus la plana del Lauragués, a l’entrada de la Montanha Negra e a unes 50 km de Tolosa, Puèglaurenç (Puylaurens) quilhat sus son puèg permet de descobrir cap al nòrd la val rica e verdejanta d’Agot e cap al sud la majestuosa Montanha Negra e la linha fabulosa dels Pirenèus tot còp ennevassadas.

2800 estatjants, cap-lòc de canton, se bastiguèt lo vilatge coma Sant-Fèlix de Lauragués o Sant-Julian de Gras Capons, sus un sèrre qui li balha aquela situacion aeriana privilegiada.
Lo vilatge es aisidament accessible en veitura tot demorant ça que la a l’escart del trafic rotièr de l’estiu.

Catarisme, Protestantisme, Republica, Puèglaurenç (Puylaurens) enriquesiguèt al fial dels sègles e de las influéncias son caractèr de tèrra d’acuèlh dels corrents religioses o filosofics precursors, que trencavan amb lor temps.

Es a Puèglaurenç, carrièra Folimont, en 1792 que foguèt batejada la Republica del nom de Marianna (Marianne), gràcia a una cançon de Guillaume Lavabre, tant adrech de sas mans de pegòt coma de sa pluma de cançonièr.